អនុគណៈកម្មការរៀបចំអត្ថាធិប្បាយ ថតរូបភាព និងផ្សាយសំឡេង ប្រជុំជាមួយក្រុមការងារ ត្រៀមផ្សាយផ្ទាល់ពីទិដ្ឋភាពនៃការប្រណាំងទូក "ង"
បន្ទាយមានជ័យ ៖ នៅរសៀលថ្ងៃទី០៧ ខែតុលា ឆ្នាំ២០២៤ អនុគណៈកម្មការរៀបចំអត្ថាធិប្បាយ ថតរូបភាព និងផ្សាយសំឡេង នៃគណៈកម្មការរៀបចំការប្រណាំងទូក បណ្តែតប្រទីប និងសំពះព្រះខែ អកអំបុក និងស្តង់ពិព័រណ៍ទូទៅ ភូមិមួយ ផលិតផលមួយ នៅខេត្តបន្ទាយមានជ័យ ដឹកនាំដោយលោក លៀម សុដា អភិបាលរងខេត្ត និងជាប្រធានអនុគណៈកម្មការរៀបចំអត្ថាធិប្បាយ ថតរូបភាព និងផ្សាយសំឡេង បានដឹកនាំប្រជុំជាមួយក្រុមការងារ ក្នុងការរៀបចំផ្សាយផ្ទាល់ពីទិដ្ឋភាពនៃការប្រណាំងទូក "ង" ដែលនឹងប្រព្រឹត្តទៅនាថ្ងៃទី២៦-២៧ ខែតុលា ឆ្នាំ២០២៤ នាដងស្ទឹងទឹកថ្លា ក្រោយបរិវេណសាកលវិទ្យាល័យជាតិ មានជ័យ ស្ថិតនៅសង្កាត់ទឹកថ្លា ក្រុងសិរសីសោភ័ណ។
ជាមួយគ្នានោះនៅរៀងរាល់រាត្រី ចាប់ពីថ្ងៃទី២៤-២៨ ខែតុលា ឆ្នាំ២០២៤ ក៏មានការប្រគំតន្ត្រីសម័យ អមដោយការដាក់តាំងស្តង់ផលិតផលខ្មែរ ព្រមទាំងមានការរៀបចំកម្មវិធីផ្សេងៗ នៅបរិវេណសួនតេជោ ឈ្នះឈ្នះ ខេត្តបន្ទាយមានជ័យ ព្រមទាំងមានការរៀបចំបណ្តែតប្រទីបអង្គភាពរដ្ឋ-វិស័យឯកជន នៅដងស្ទឹងព្រះពន្លា ក្រុងសិរីសោភ័ណ ចាប់ពីថ្ងៃទី២៦ ខែតុលា ដល់ថ្ងៃទី១៦ ខែវិច្ឆិកា ឆ្នាំ២០២៤។ ចំពោះពិធីអកអំបុក និងសំពះព្រះខែ នឹងរៀបចំនារាត្រីថ្ងៃទី១៥ ខែវិច្ឆិកា ឆ្នាំ២០២៤ នៅបរិវេណសួនតេជោឈ្នះឈ្នះ ខេត្តបន្ទាយមានជ័យ។
Post a Comment