ឯកឧត្តម ឧត្តមសេនីយ៍ឯក ឃឹង សារ៉ាត់ អញ្ជើញដឹកនាំកិច្ចប្រជុំបូកសរុបការងារប្រឆាំងការសម្អាតប្រាក់ ការបញ្ចូលទិន្នន័យទៅក្នុងប្រព័ន្ធ (Database System ) និងការអនុវត្តដីកាប្រចាំឆ្នាំ២០២៤ និងផ្សព្វផ្សាយទិសដៅការងារបន្តសម្រាប់ឆ្នាំ២០២៥

 

រាជធានីភំ្នពេញ៖ នាព្រឹកថ្ងៃទី១៧ ខែកុម្ភៈ ឆ្នាំ២០២៥ ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន បានអញ្ជើញដឹកនាំកិច្ចប្រជុំបូកសរុបការងារប្រឆាំងការសម្អាតប្រាក់ ការបញ្ចូលទិន្នន័យទៅក្នុងប្រព័ន្ធ ( Database System ) និងការអនុវត្តដីកាប្រចាំឆ្នាំ២០២៤ និងផ្សព្វផ្សាយទិសដៅការងារបន្តសម្រាប់ឆ្នាំ២០២៥ នៅអគ្គស្នងការដ្ឋាននគរបាលជាតិ ដោយមានការចូលរួមពីលោកឧត្តមសេនីយ៍ នាយករងមន្ទីរ លោកវរសេនីយ៍នាយការិយាល័យទាំង១១ និងលោកនាយការិយាល័យប្រឆាំងគ្រឿងញៀនខេត្ត សរុប១៣៣រូប (ស្រី១៣រូប)។

ជាកិច្ចចាប់ផ្តើម ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន មានប្រសាសន៍ថា ដោយទទួលបានផែនការ ស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ រយៈពេល១ឆ្នាំ ចាប់ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០២៥ របស់រាជរដ្ឋាភិបាល និងផ្អែកតាមផែនការរបស់អគ្គស្នងការដ្ឋាននគរបាលជាតិ ជាពិសេសលើការស៊ើបអង្កេតបទល្មើសសម្អាតប្រាក់ ការបញ្ចូលទិន្នន័យទៅក្នុងប្រព័ន្ធ ( Database System ) ការគ្រប់គ្រង ដីកា និងការអនុវត្តដីកា ឱ្យកាន់តែមានប្រសិទ្ធភាពខ្ពស់ ឯកឧត្តម ឧត្តមសេនីយ៍ឯក សូមដាក់ចេញនូវទិសដៅការងារសម្រាប់អនុវត្តបន្តឆ្នាំ២០២៥ រួមមានដូចខាងក្រោម ៖

១-សូមបន្តរក្សានិរន្តរភាពស៊ើបអង្កេតបទល្មើសសម្អាតប្រាក់ ស្របតាមសំអាងបទល្មើសឱ្យបានគ្រប់ជ្រុងជ្រោយប្រកប ដោយគុណភាព និងជំរុញការស៊ើបអង្កេតបទល្មើសសម្អាតប្រាក់ ស្របតាមសំអាងនូវបទល្មើសឲ្យបានលើសពី ៣៦% នៃសំអាងបទល្មើសសរុប។

២-ពង្រឹង និងលើកកម្ពស់កិច្ចសហការជាមួយស្ថាប័នជាតិ-អន្តរជាតិ ទាំងផ្លូវការ-ក្រៅផ្លូវការក្នុងការផ្លាស់ប្ដូរព័ត៌មានបម្រើដល់ការស៊ើបអង្កេតនិងពន្លឿននីតិវិធីស៊ើបអង្កេត។

៣-បន្តបណ្តុះបណ្តាលពង្រឹងសមត្ថភាពមន្ត្រីអនុវត្តច្បាប់លើជំនាញស៊ើបអង្កេតបទល្មើសសម្អាតប្រាក់។

៤-ពង្រឹងការយកចិត្តទុកដាក់ លើការគ្រប់គ្រងស្ថិតិទិន្នន័យស៊ើបអង្កេតបទល្មើសសម្អាតប្រាក់ ឱ្យបានល្អពេញលេញ និងគ្រប់ជ្រុងជ្រោយ (ករណីចាប់ពី ១០ ក្រាមឡើង) និងថតចម្លងសំណុំរឿងឱ្យក្រុមការងារ ឱ្យបានទៀងទាត់ ជារៀងរាល់ខែតាមការកំណត់។

៥-ត្រូវក្តាប់ស្ថានភាពឱ្យបានជាប់ប្រចាំ អំពីសភាពការណ៍ជាតិ អន្តរជាតិពាក់ព័ន្ធនឹងកម្ពុជា ព្រមទាំងសភាពការណ៍ជាសកលអំពីការងារប្រឆាំងការសម្អាតប្រាក់។

៦-បន្តបញ្ចូលទិន្នន័យ ករណីចាស់ៗដែលនៅសេសសល់ ទៅក្នុងប្រព័ន្ធឱ្យបាន ១០០%។

៧-ជំរុញឱ្យមន្ត្រីជំនាញត្រូវបញ្ចូលទិន្នន័យបទល្មើសគ្រឿងញៀនទៅក្នុងប្រព័ន្ធ (Database System) ឱ្យបានត្រឹមត្រូវគ្រប់ករណីមុននឹងបញ្ជូនសំណុំរឿងទៅតុលាការ និងត្រូវធ្វើបច្ចុប្បន្នភាពជាប់ប្រចាំ។

៨-បង្កើនកិច្ចសហការឱ្យបានជិតស្និតរវាងក្រុមការងារជំនាញគ្រប់គ្រង តាមដានការបញ្ចូលទិន្នន័យទៅក្នុងប្រព័ន្ធរបស់មន្ទីរប្រឆាងគ្រឿងញៀន ជាមួយមន្រ្តីជំនាញ នៃស្នងការដ្ឋាននគរបាលរាជធានី-ខេត្ត ។

៩-បន្តបើកវគ្គបណ្តុះបណ្តាល មន្ត្រីជំនាញបច្ចេកទេសបញ្ចូលទិន្នន័យបទល្មើសគ្រឿងញៀនទៅក្នុងប្រព័ន្ធ និងបច្ចេកទេសស៊ើបអង្កេតបទល្មើសសម្អាតប្រាក់។

១០-ពង្រឹងការគ្រប់គ្រង ការស្រាវជ្រាវ និងការអនុវត្តដីកាដែលនៅសេសសល់ ដោយធ្វើបច្ចុប្បន្នភាពជាប់ជាប្រចាំ ជាពិសេសស្រាវជ្រាវរករូបថតមុខសញ្ញាដែលមានដីកា ហើយត្រូវបញ្ចូលទិន្នន័យដីកា និង រូបថតទាំងអស់ទៅក្នុងប្រព័ន្ធ។

១១-បន្តពង្រឹងការធ្វើរបាយការណ៍បូកសរុប ប្រចាំថ្ងៃ សប្តាហ៍ ខែ ឱ្យបានទៀងទាត់តាមការកំណត់។

បន្ទាប់ពីបានស្តាប់ របាយការណ៍សង្ខេបការបូកសរុបលទ្ធផលការងារប្រឆាំងការសម្អាតប្រាក់ ការបញ្ចូលទិន្នន័យក្នុង ប្រព័ន្ធ Database System និងការអនុវត្តដីកា ប្រចាំឆ្នាំ២០២៤ ដែលអានដោយលោកវរសេនីយ៍ត្រី ឌុច វ៉ាន់ឌី នាយរងការិយាល័យរដ្ឋបាល-សរុបរួចមក លោកឧត្តមសេនីយ៍ទោ អិន សុង នាយករងមន្ទីរប្រឆាំងគ្រឿងញៀន ក៏បានឡើងពន្យល់ណែនាំអំពីចំណុចខ្វះខាត បញ្ហាប្រឈម អំពីការងារប្រឆាំងការសម្អាតប្រាក់ ការបញ្ចូលទិន្នន័យក្នុង ប្រព័ន្ធ Database System និងការអនុវត្តដីកា។

លោកឧត្តមសេនីយ៍ទោ អិន សុង ក៏បានកោតសរសើរដល់លោកនាយការិយាល័យតាមបណ្តារាជធានី-ខេត្តនិងមន្រ្តីជំនាញមួយចំនួន ដែលកន្លងមកបានយកចិត្តទុកដាក់ក្នុងការបញ្ចូលទិន្នន័យក្នុងប្រព័ន្ធបានល្អ ហើយចំពោះខេត្តណាដែលមិនទាន់ល្អត្រូវខិតខំប្រឹងប្រែងរៀនសូត្របន្ថែមទៀត។

លោកឧត្តមសេនីយ៍ទោ នាយករងមន្ទីរក៏បានលើកយកចំណុចខ្លាំងចំនួនដែលសម្រេចបានលទ្ធផលកន្លងមករួមមាន ៖

- បណ្តាការិយាល័យ ចំណុះមន្ទីរប្រឆាំងគ្រឿងញៀន និងបណ្តាការិយាល័យប្រឆាំងគ្រឿងញៀនរាជធានី ខេត្តមួយចំនួនធំ បានបន្តការយកចិត្តទុកដាក់ ស៊ើបអង្កេតបទល្មើសសម្អាតប្រាក់ ស្របតាមសំអាងនៃបទល្មើស និងតែងតែអនុវត្តតាមផែនការក្រុមការងារថ្នាក់ជាតិជាប់ជាប្រចាំ។

- មានការគ្រប់គ្រងស្ថិតិទិន្នន័យទាំងករណីធម្មតា និងធ្ងន់ធ្ងរ និងការរក្សាទុកនូវឯកសារសំណុំរឿង បទល្មើសសម្អាតប្រាក់បានយ៉ាងហ្មត់ចត់។

- ធ្វើរបាយការណ៍បានទៀងទាត់ល្អ ជូនទៅក្រុមការងារប្រឆាំងការសម្អាតប្រាក់របស់អគ្គស្នងការដ្ឋាននគរបាលជាតិ។

- បើកវគ្គបណ្តុះបណ្តាលពង្រឹងសមត្ថភាព ជំនាញស៊ើបអង្កេតបទល្មើសម្អាតប្រាក់ ជាបន្តបន្ទាប់។

- បានពង្រឹងការគ្រប់គ្រង ការស្រាជ្រាវ និងការអនុវត្តដីកាដែលនៅសេសសល់ ដោយធ្វើបច្ចុប្បន្នភាពជាប់ជាប្រចាំ ជាពិសេសស្រាវជ្រាវរករូបថតមុខសញ្ញាដែលតាមចាប់ខ្លួន ហើយបូកសរុប រាយការណ៍ មកមន្ទីរប្រឆាំងគ្រឿងញៀនជារៀងរាល់ខែ និងបានបញ្ចូលដីកាទៅក្នុងប្រព័ន្ធបច្ចេកវិទ្យាបានត្រឹមត្រូវ៕